په بامیان پوهنتون کې د عالیه او عالمیۀ دورې ازموینې پیل شوې!
نن، د ۱۴۴۶ هجري قمري کال د رجب المرجب ۱۱مه، چې د ۱۴۰۳ هجري شمسي کال د جدې ۲۲مې نېټې سره برابره ده، د لوړو زده کړو وزارت د لایحې مطابق، د خصوصي او جهادي مدارسو د عالیه او عالمیۀ دورې ازموینې په ټول هیواد کې پیل شوې.
په بامیان پوهنتون کې د ازموینو د پرانیستې په مراسمو کې، ددغه پوهنتون عمومي رئیس الحاج مفتي حضرت محمد برهاني وویل چې دا ازموینې د دیني زده کړو د پرمختګ لپاره مهمې دي او د علمي کچې لوړولو په لور یوه لویه هڅه ده. د بامیان والي الحاج مولوي عبدالله سرحدي هم د ازموینو پیل ته اشاره وکړه او زیاته یې کړه چې دغه ازموینې د دیني زده کړو د پیاوړتیا لپاره اړینې دي او د دې پروسې د شفافیت ټینګار یې وکړ.
مسئولینو وویل چې ټول لازم تدابیر نیول شوي دي او ددغه پروسې د شفافیت ډاډ یې ورکړ.
بامیان پوهنتون
نشراتو عمومي مدیریت
