په بامیان پوهنتون کې د عالیقدر امیرالمؤمنین (حفظهالله) د (۱۷)مې ګڼې فرمان په تړاو یو ورځنی کنفرانس جوړ شو!
نن دوشنبه د ۱۴۴۶ هجري قمري کال د ذوالحجې ۲۶مه نېټه بامیان پوهنتون د امیرالمؤمنین (حفظهالله) د ۱۷م ګڼې فرمان د تشریح او بیان په موخه د یوه ورځني کنفرانس کوربه وو.
یاد فرمان د ټولنې د ناسم رواجونو، خرافاتو او غیرشرعي دودونو د مخنیوي په موخه صادر شوی دی.
دغه راز یاد کنفرانس د پوهنتون د ارشاددعوت آمریت او د نشراتو او عامه پوهاوۍ عمومي مدیریت له خوا د دې علمي بنسټ د کتابتون په تالار کې تنظیم شوی وو، چې د پوهنتون د عمومي رئیس الحاج مفتي حضرت محمد برهاني په ګډون د احکامو فرامینو د تعقیب او امرباالمعروف ریاستونو استازو، دپوهنتون مرستیالانو، استادانو او اداري کارکوونکو برخه درلوده.
په غونډه کې د ۱۷مې ګڼې فرمان متن د حاضرینو تر غوږو ورسول شو، او د فرمان محتوا له مختلفو اړخونو وڅېړل شوه.
د دې علمي پروګرام ترینر پوهنوال داکتر احسانالحق نیازی وه چې په خپله مفصله علمي وینا کې یې د فرمان ټولنیز، فرهنګي او دیني اړخونه تحلیل کړل.
نوموړي ټینګار وکړ چې علمي بنسټونه مسؤلیت لري چې د اسلامي ارزښتونو ته د پایښت ورکولو لپاره هڅې وکړي.
د غونډې په پای کې ګډونوالو د کنفرانس له جوړېدو خوښي وښوده او ژمنه یې وکړه چې د یاد فرمان د تطبیق او ترویج په برخه کې به لازمه همکاری کوي، او د ټولنې له چاپېریاله د ناسم رواجونو د له منځه وړلو لپاره به مؤثر ګامونه پورته کوي.
بامیان پوهنتون
نشراتو عمومي مدیریت