د فلسفې نړیوالې ورځې لمانځل!
نن دوشنبه نېټه ۱۴۴۶/۵/۲۳ هـ ق کال په بامیان پوهنتون کې د فلسفې نړیواله ورځ ولمانځل شوه.
په دغه مراسمو کې چې د معلوماتي تکنالوژۍ په تالار کې نیول شوي و، د پوهنتون مرستیالانو، د بامیان ولایت عُلُماوو شورا رئیس، پوهنځیو رئیسانو، څانګو آمرینو، استادانو او محصلینو ګډون کړی و، د قرآن عظیم الشان د څو مبارکو آیتونو په تلاوت سره پیل شوو.
په پیل کې پوهنمل عبدالصمد حکمت د فلسفې څانګې آمر ګډونوالو ته د ښه راغلاست ترڅنګ د فلسفې نړیوالې ورځې مبارکي وویله.
ورپسې د پوهنتون د علمي چارو مرستیال پوهنمل محمد عثمان څولیزي د فلسفې په اړه ګټورې خبرې وکړې نوموړي وویل «فلسفه د پوښتنې کولو هنر دی، فلسفه د هغو علومو له ډلې څخه ده چې زده کړه یې له انسان سره په ځان پېژندنه او ځان جوړونه کې مرسته کوي».
دغه راز د بامیان ولایت د عُلُماوو شورا رئیس مولوی نصرالله واعظي د فلسفې په اړه د اسلام سپېڅلي دین له نظره معلومات ورکړل.
په پای کې د فلسفې څانګې استاد پوهنمل محمد هادي باهنر د فلسفې د تاریخ او ریښې په اړه خبرې وکړې. او په دعائی سره غونډه پای ته ورسېده.
بامیان پوهنتون
نشراتو عمومي مدیریت